Thari Mirwah

welcome in the site of Thari Mirwah

News

Bilawel Bhutto Hope for Pakistan

Posted by Sana Baloch on March 6, 2014 at 1:35 AM

 

ثنا عباس دشتي

 

جتي زندگي بيٺل پاڻي جو سينوريل تلاءُ ٿيڻ ڏانهن وڌي رهي هجي ۽ هوائن نالي ڪا شيءَ نه بچي رهي هجي،اتي پيپلز پارٽي جي نوجوان قيادت بلاول ڀٽو زرداري سنڌ ڪلچرل فيسٽويل جي وسيلي عوام کي تازي هوا جو جهوٽو کارايو آهي. گُهٽ ٻوسٽ واري ماحول مان ڪڍي انهن کي پنهنجي تهذيب ۽ ورثي جي معرفت پنهنجي اصل ڏانهن موٽڻ جو هڪ شاندار موقعو فراهم ڪيو آهي. موئن جي دڙي کان سنڌ ڪلچرل فيسٽويل جون تقريبون شروع ڪرڻ سان بلاول جو ڪو ٻيو مقصد نه پر صرف اهو هو ته،دنيا کي خبر پوي ته پاڪستان ۾ سياست رڳو انتهاپسندي ۽ طالبان جي جنجهٽ ۾ ئي ناهي ڦاٿل پر اتي پنهنجي تهذيب،پنهنجي ورثي ۽ تاريخ سان پيار ڪرڻ وارو نوجوان نسل به موجود آهي. پيپلز پارٽي جو نوجوان اڳواڻ بلاول ڀٽو زرداري ان وقت انتها پسند قوتن کي دليري سان پنهنجي ثقافت ۽ ننڍي کنڊ جي ناچڻي سمبارا وسيلي للڪاري رهيو آهي،جڏهن ملڪ جا ڪئين انڌا اونڌا ويڄ انتهاپسندن سان ڳالهيون ڪري رهيا آهن،انهن کي وڌڻ ويجهڻ جا وڌيڪ شاندار موقعا فراهم ڪري رهيا آهن،پر بلاول پنهنجي نالي جي عظمت وانگر اڪيلو بلاول ٿي انتهاپسندن جي سڄي لشڪر کي للڪاري رهيو آهي.

 

بلاول کي ڪنهن جي ڪا به پرواهه ناهي. جتي سياستدانن جي گهڻائي طالبان جي پاسي ٿي بيٺل آهي،اتي بلاول اڪيلو سرِعام بنا ڪنهن ”اگر مگر“ ڪرڻ جي عوام جي پاسي ٿي بيٺل آهي،زندگي جي پاسي ٿي بيٺل آهي، راڳ ۽ رقص سان چاهه رکندڙن جي تهذيب جي پاسي ٿي بيٺل آهي. هو پنهنجي انٽرويوز ۽ ٽوئٽر ميسيجز تي به ان ڳالهه جو اظهار ڪندو رهيو آهي ته،ملڪ جا اڪثر سياستدان خوف کان طالبان جي پاسي ٿي بيٺل آهن،جو هو کلي سامهون اچي انهن جي خلاف ڪو بيان به جاري نٿا ڪن. بلاول عوام کي اهو به ياد ڏياري چڪو آهي ته،عام چونڊن ۾ جتي طالبان جي حامي ۽ همدرد سياسي پارٽين کي اليڪشن مهم هلائڻ جي کلي اجازت هئي، اتي سيڪيولر سياسي پارٽين جهڙوڪ؛ پيپلز پارٽي،عوامي نيشنل پارٽي ۽ ايم ڪيو ايم کي اليڪشن مهم به هلائڻ نه ڏني وئي.هاڻي ته قصو ايستائين کلي عوام جي سامهون اچي ويو آهي جو، جن عوام بجاءِ طالبان سان اتحاد ڪري ڪافي تڪن مان اليڪشن کٽي اهي عوام جي خوف کان طالبان سان ٿيندڙ ڳالهين وارين ڪاميٽين مان پنهنجا نالا به ڪڍرائي پيا وڃن.هن وقت ملڪ ۾ سياست پرو طالبان ۽ پرو عوام وارن خانن ۾ ورهايل آهي.

 

بلاول ڀٽو زرداري موت جي واپارين خلاف هن ملڪ ۾ زندگي جو وڏو آواز ٿي اڀريو آهي.جيڪي ماڻهو اهي بحث ڪندا هئا ته هن ملڪ ۾ ليڊر شپ جي کوٽ آهي،في الحال بلاول جي ٿقافتي انقلاب واري نعري ۽ عمل انهن جا منهن بند ڪرائي ڇڏيا آهن. سنڌ جي هر شهر ۽ خاص طور حيدرآباد،سکر،لاڙڪاڻي،خيرپور ميرس،ميرپور خاص،ٺٽي ۽ ڪراچي ۾ سنڌ ڪلچرل فيسٽويل جون ڪيتريون ئي تقريبون ٿيون آهن،جن مان عوام نه رڳو لطف اندوز ٿيو آهي،پر ان لاءِ زندگي جي هڪ اميد، هڪ آسرو به پيدا ٿيو آهي ته،ڀلا ڪو ته هو،جنهن هن قبرستان جهڙي تصوير جو ڏيک ڏيندڙ سماج ۾ ڏاڍ کي للڪاريو،زور زبردستي کي للڪاريو،ڏنڊي ۽ ڏاڍ واري عقيدائي برانڊ خلاف ٿي بيٺو، انتهاپسندي کي للڪاريو.بلاول ڀٽو زرداري پنهنجي امڙ بينظير ڀٽو شهيد جيان سڀ ڪجهه ڄاڻندي به پنهنجي ملڪ جي ماڻهن جي پاسي ٿي بيٺو آهي،پنهنجي تاريخ ۽ تهذيب جي پاسي ٿي بيٺو آهي.هن کي ڪنهن خطيب ۽ ڪنهن رقيب جو خوف ناهي،هن کي خبر آهي ته،اهڙي موت جي پوڄاري اقليت سان وڙهڻ لاءِ هن وٽ هن ملڪ جي عوام جي بي مثال محبت جو هٿيار موجود آهي.اهو هٿيار جيڪو ذوالفقار علي ڀٽو وٽ به هو ته،بي بي شهيد وٽ به. جنهن ڪنهن به جابر ۽ آمر اڳيان پنهنجو ڳاٽ نه جهڪايو.بلاول ڀٽو زرداري پنهنجي ناني ۽ امڙ جي سياسي نظرئي ۽ پارٽي کي بچائڻ لاءِ هن ملڪ جي عوام جي خواهشن ۽ خوابن کي بچائڻ لاءِ ثقافت وسيلي جيڪا پر امن جنگ شروع ڪئي آهي،ان کي نه رڳو ملڪي ميڊيا پر عالمي ميڊيا ۾ به تمام گهڻو ساراهيو پيو وڃي.

 

عام طور اسان وٽ سياسي پارٽين جا قائد پنهنجي انفرادي ۽ سياسي پارٽين جي ترقي لاءِ ڪئين پروگرام متعارف ڪرائيندا آهن،پر انهن سان سماج جي ترقي نه ٿيندي آهي، انساني قدرن ۾ ڪا مثبت تبديلي نه ايندي آهي.انسان جي اندر جو جارحيت پڻو نه گهٽبو آهي،پر بلاول ڀٽو زرداري جي هن ڪوشش سان سماجي سائنس جا ڄاڻو چون ٿا ته،سماج ۾ جارحيت وارا رويا گهٽبا، مثبت قدر پيدا ٿيندا.سماج تڏهن ئي ترقي ڪندو جڏهن ان تي سياست جا مثبت اثر پوندا،جيڪا جدوجهد بلاول ڀٽو زرداري ڪري رهيو آهي.

 

بينظير صاحبه پنهنجي جڳ مشهور آتم ڪٿا،Dauther of the East ۾ لکيو آهي: بلاول تي بلاول نالو اسان آصف علي زرداري جي هڪ وڏي جي نالي ۽ سنڌ جي تاريخ جي اڏول ڪردار مخدوم بلاول جي نالي پٺيان رکيو آهي.جڏهن بلاول ڀٽو تاريخ جي هڪ وڏي حادثي بعد سياسي ميدان ۾ پيپلز پارٽي جي اڳواڻ جي صورت ۾ آيو آهي،ته هن خوب ملهايو آهي.توڻي جو اڃا هن جا هي سياست ۾ تعارفي ڏينهن آهن،پر هو پنهنجو ڪرشماتي تعارف جوڙي چڪو آهي. ملڪ ۾ نوجوانن جو وڏو انگ بلاول ڀٽو زرداري کي پنهنجو سياسي آئيڊيل سمجهي ٿو. جن ليڊرن ۽ سياسي پارٽين نوجوانن کي نعري بازي سان جارحيت پئي سيکاري، نوجوانن جي دماغن اندر نفرت جي باهه پئي ڀڙڪائي،اتي بلاول ڀٽو زرداري انهن نوجوانن کي پنهنجي تاريخ، ثقافت ۽ ورثي کان باخبر ڪري رهيو آهي،انهن کي امن جا گيت جهونگارڻ جا موقعا فراهم ڪري رهيو آهي. هن وقت نوجوانن لاءِ بلاول ڀٽو زرداري زندگي ۽ بهادري جو استعارو آهي.بلاول ملڪ جي ڪنڊ ڪڙڇ ۾ امن جي گيتن جو پڙاڏو چاهي ٿو.هن پنهنجي سياسي ڪيرئير جي آغاز ۾ ئي ثقافت ۽ تاريخ جي ڳالهه سان سياست ڪئي آهي.هن وٽ ڪو جذباتي نعرو ناهي،پر دليل آهن،حوالا آهن،پنهنجي وڏن جو ورثو آهي.هو رڳو نوجوانن کي ياد ٿو ڏياري پنهنجي تاريخ،پنهنجو ماضي، پنهنجي تهذيب ۽ پر امن ماحول جڏهن اسان وٽ موئن جي دڙي جي ناچڻي سمبارا واري سنڌ هئي،جڏهن راڳ هو رقص هو،جڏهن سُر تي سِر ڏيڻ وارن جي خطي طور اسانجو ديس سڄاتو ويندو هو.هي تهذيبن جو ٽڪراءُ ۽ بنيادي پرستي جي ٽڪراءُ وارا عنوان ته ڪالهه جي ڳالهه آهن.ان ڪالهه کي بلاول ڀٽو زرداري پنهنجي ثقافتي ڪوششن سان حقيقي ”ڪالهه“ ۾ ئي تبديل ڪري رهيو آهي،جيڪا اسان جي پر امن ”سڀاڻي“ جي وڏي جيت آهي.اسانجو سڀاڻ تڏهن ئي خوشحال ۽ مهذب هوندو جڏهن اسان ان کي اهڙو بنائڻ لاءِ اڄ کان بلاول ڀٽو زرداري جهڙن بهادر ۽ پنهنجي ڪلچر ۽ تاريخ کان واقف اڳواڻن کي پاليسي ساز فورمن تائين پهچائينداسين.بلاول ڀٽو زرداري جي سياست سان ڪيترن ئي ڪليجي چٻائوئن جا اندر اڌ ٿيا هوندا، پر اڄ ڳڙهي جي مٽي ۾ مدفون بي بي شهيد فخر مان پنهنجي اڪيلي پٽ جي سياسي عمل ۽ ڪردارتي ائين ئي فخر ڪري رهي هوندي، جيئن هن ملڪ جي هر ملالا ۽ هر شهيد اعتزاز ڪري رهيا آهن.

Categories: None

Post a Comment

Oops!

Oops, you forgot something.

Oops!

The words you entered did not match the given text. Please try again.

Already a member? Sign In

0 Comments