Thari Mirwah

welcome in the site of Thari Mirwah

News

Thar Draught... Column

Posted by Sana Baloch on March 10, 2014 at 4:55 AM

 

ٿر: جتي اڃ، رڃ ۽ درد جا آکيرا آهن

ثنا عباس دشتي

هونئن ته سڄي سنڌ مهانگائي، بيروزگاري، بُک ۽ بدحاليءَ جي باهه ۾ سَڙي رهي آهي پر سنڌ جي صحرائي علائقي ٿر جا سُور ڪجهه سَوايا ئي آهن. ٿر جي ماروئڙن جي مايوس چهرن تي مُرڪ تڏهن ئي پَسي سگهبي آهي، جڏهن ويران واريءَ جي دڙن تي مِينهَن ڪَڻيون وَسنديون آهن، اُن ويل سڄو ٿر فطرتي حُسن جي سائي چادر ويڙهي خوبصورت منظر پيش ڪندو آهي، مورن جا ٽهوڪا ۽ خوبصورت رقص دل کي راحت بَخشيندو آهي، پر جڏهن بانورا بادل بيوفائي ڪندا آهن ۽ جنهن سال ٿر ۾ وسڪارو نه ٿيندو آهي، ته هِي مارو ماڻهو پيرين پنڌ پنهنجي مال متاع سان گڏ بئراجي علائقن جو رُخ ڪندا آهن. قدرتي آفتون ۽ ڏُڪار ته سڄي دنيا ۾ اچن ٿا پر اسان وٽ اهڙن ڏُڪار ۽ آفتن سٽيل ماڻهن کي وڌيڪ سُور بدتر حڪمرانيءَ سبب سَهڻا پون ٿا، هن سال به ٿر ۾ به ڏُڪار آيل آهي، تازو ٿر ۾ ماروئڙن ۽ مال مٿان بدتر حڪمرانيءَ سبب آيل ڏُکين ڏينهن تي پيپلز پارٽيءَ جي چيئرمين بلاول ڀٽو زرداريءَ پنهنجي ٽوئيٽر تي هڪ ميسيج جاري ڪيو ۽ ٿر ۾ معصوم ٻارڙن جي غِذا جي کوٽ سبب ۽ مال جي بيمارين ۽ چاري جي کوٽ تي سنڌ جي خوراڪ کاتي جي وزير کي دُبئي طلب ڪري ورتو. اسانجي ملڪ ۾ بدانتظامي ۽ بحرانن جي ذميوار وزيرن، مشيرن ۽ ڪامورن کي احتساب مان گذارڻ بدران انهن کي لنڊن، دبئي ۽ سعودي طلب ڪري سندن کاتي جي بدانتظامي ۽ بي ڌيانيءَ جا ميڊيا ۾ ڦاٽ ڇو ڦاٽا؟ يا ڳالهه ايستائين ڇو پهتي جو هر طرف کان سندن خلاف آواز اُٿڻ لڳو. هاڻي پاڻ وٽ حڪمران جماعتن جي اها روايت قائم ٿي وئي آهي ته، سندن بي ڌياني ۽ بدتر حڪمرانيءَ تي ڪنهن طرح سان ’ڪَکَ‘ پيل هجن. ايستائين ٿرپارڪر جي سڄي حڪومتي مشينري اگهور ننڊ سُتل هئي، جيستائين وڃي ميڊيا مٺيءَ جي اسپتال ۾ معصوم گُلڙن جي ڪومائجي وڃڻ واري خبر بريڪ نه ڪئي. سنڌ جي وڏي وزير پهرين ته ٿر جي دوري دوران بجاءِ ڪنهن رليف پئڪيج جي اعلان ڪرڻ جي، بيمارين ۽ اناج جي کوٽ وگهي ڏُکن ۾ گذاريندڙ ٿر جي وڏي آباديءَ جي آمدنيءَ جي اهم ذريعي چوپائي مال جي وڪري تي به 15 ڏينهن لاءِ پابندي لاڳو ڪري ڇڏي. پر ٻئي ڏينهن جڏهن سنڌ جي وڏي وزير کي پنهنجي ماتحت عملي جي ڪوتاهيءَ جو احساس ٿيو، ته هن ٿر لاءِ 10 ڪروڙ رپين جي پئڪيج جو اعلان ڪيو، ان کانسواءِ وزير اعظم نواز شريف به نيشنل ڊزاسٽر مئنيجمينٽ اٿارٽي (NDMA )کي ٿر ۾ امدادي سرگرميون شروع ڪرڻ جو حڪم جاري ڪيو هو پاڻ به اڄ ٿر پهچي رهيو آهي. ٻئي طرف حالت اها آهي جو جنهن ڏينهن سنڌ جو وڏي وزير ٿر جي دوري تي پهتو، ان وقت مٺيءَ جي چونڊيل نمائندن به مٺي جي اسپتال ۾ فوت ٿيل معصوم ٻارڙن واري معاملي ۽ مسلسل چوپائي مال جي مرڻ وارين خبرن تي پهريان ته پورو سچ پئي ڳالهايو پر جڏهن سندس ليڊر آف دي هائوس مٺي پهتو، ته انهن به پنهنجي تر ۽ تڪ جي ماڻهن جو موقف بيان ڪرڻ بجاءِ اڌ سچ ڳالهائي باقي ٿر جي ماروئڙن جي زخمن تي لوڻ ٻُرڪڻ وارن جو موقف ئي ميڊيا اڳيان رکيو. اهڙن ماڻهن جي بيرحم روين ۽ پٿر دليءَ تي روئندي ئي شايد مشهور سماج سڌارڪ مدر ٽريسا ڪٿي چيو هو ته، ماڻهو اناج جي کوٽ سبب نه پر محبت جي ڏُڪار ۾ مري ٿا وڃن. شيخ اياز به ٿر جي مارو ماڻهن جي دردن جي عڪاسي پنهنجي لفظن ۾ ڪندي چوي ٿو ته:

هِي چونئرا جي چانڊوڪيءَ ۾، ڪاري ٿر تي بيٺا آهن،

پنهنجا پنهنجا ڏُکَ لِڪائي، ٻارَ بُکايل ڇاتِي لاءِ،

رٻ رڳي لاءِ آتا آهن، چنڊ انهيءَ لاءِ ڪا شئي ناهي،

ڪيڏي سونهن سمي پيئي پر، منڊ انهن لاءِ ڪا شئي ناهي.

جيڪڏهن ٿر جي ماروئڙن جي دردن جو سنڌ حڪومت ۽ پيپلز پارٽيءَ جي نوجوان ليڊر بلاول ڀٽو زرداريءَ کي درمان ڪرڻو آهي ته، سڀ کان پهرين ان ڳالهه جي جاچ ٿيڻ گهرجي ته، سيپٽمبر 2013ع ۾ جاري ٿيل 60 هزار ڪڻڪ جون ٻوريون ورهائجي ڇو نه سگهيون؟ ٻيو ته، هڪ رليف کاتو به ٿيندو آهي، ان رليف کاتي جو هڪ وزير به مقرر ٿيل آهي پر اهو رليف کاتو ۽ کاتي جو وزير ڪٿي آهي؟ موسمي حساب سان ۽ فصل ٿيڻ ۾ اڃا 8 مهينا باقي آهن. پوءِ باقي رهيل ستن مهينن لاءِ حڪومت ڪهڙي رٿابندي ڪئي آهي؟ ڏُڪار کي وڌيڪ ڪيئن منهن ڏبو ان لاءِ ڇا رٿيو ويو آهي؟ ڪجهه آفيسرن کي معطل ڪرڻ سان ٿر تان ڏُڪار ختم ٿيڻ جي ڪا به خاطري ناهي. سنڌ حڪومت ۽ ٿر جي چونڊيل نمائندن کي گهرجي ته، پنهنجي ماروئڙن جي غير مشروط خدمت ڪن. پيپلز پارٽيءَ جي ليڊر بلاول ڀٽو زرداري، جنهن مان اڪثريت کي وڏيون اُميدون آهن، کي سنڌ جي ثقافت تي توجهه ڏيڻ سان گڏوگڏ پنهنجي سنڌ حڪومت جي حڪمرانيءَ واري طرز تي به نگاهه رکڻ گهرجي ته، پيپلز پارٽيءَ جي پنهنجي هوم گرائونڊ سنڌ ۾ ڪارڪردگي ڪهڙي آهي!

 

The Kawish Group of Publication

B/2 Civil Line Hyderabad,Sindh Pakistan.

Phone:+92 (22) 2780026,2780027,2780525 Fax: +92 (22) 2780772, 2781167

Email: [email protected]

 

Categories: None

Post a Comment

Oops!

Oops, you forgot something.

Oops!

The words you entered did not match the given text. Please try again.

Already a member? Sign In

0 Comments